Mga Person with Disability kon PWD sa Sarangani, malipayon human sa pagsaulog sa Disability Prevention and Rehabilitation Week

30 Jul 2015
818 times

Malipayon ang kahugpungan sa mga PWD o person with disability sa probinsya sa Sarangani human sa pagtapos sa Disability Prevention and Rehabilitation Week nga gipahigayon ang provincial culmination program niaging adlaw nga Martes sulod sa Sarangani Capitol Gym.

Segun ni Ildefonso Gargaran, taga-munisipyo sa Malungon og nahimong acting president sa Sarangani PWD Federation, dako ang kalipay sa ilang kahugpungan tungod kay nakita niini nga nagpabilin ang hugot nga suporta og ayuda sa mga local official sa pagpanguna ni Governor Steve Chiongbian Solon kauban sila Congressman Manny, Vice Governor Jinkee Pacquiao og mga board member taliwala nga aduna silay mga diperensya sa panglawas.

Aron matabangan pa ang mga PWD apil na ang ilang mga ginikanan nga matudluan sa saktong paggalam o therapy hilabi na ngadto sa mga bata nga adunay sakit nga cerebral palsy og ang pag-rescue panahon sa mga kalamidad, apil na ang pagbaton og mga livelihood kon mga panginabuhian gawas sa ayuda sa lokal nga gobyerno, aktibo nga nihatag sa mga lecture og mga orientation ang mga taga-Department of Labor and Employment pinaagi sa supervising labor and employment officer niini nga si Rabia Bajolo. Apil nga nihatag og basic first aid demonstration ang Philippine National Red Cross.

Naghinaot na lamang si Cesario Cagas, executive assistant ni Governor Steve Chiongbian Solon, nga magpadayon ang pagiging aktibo sa kahugpungan sa mga PWD aron adunay dungag nga produktibong hut-ong sa katilingban inabagan sa suporta sa kadaghanan.

Usa sa mga prayoridad nga programa sa Sulong Sarangani mao ang alang sa mga persons with disabilities rason nga namugna karon lamang sa kasamtangang administrasyon ang provincial federation sa mga PWD sa tibuok Sarangani. Ubay-ubay nga mga medical og health services ang libre kining naapud-apod sa Sarangani Provincial Government ngadto sa mga PWD sama na lang sa paghatag og mga wheelchair, saklay, tungkod, artificial leg o prosthesis, og mga hearing aid, diin mubalor ang tanan sa minilyon ka pesos. Kauban sa Provincial Government sa Sarangani sa pagpanghatag og libreng mga gamit og himan ang mga partner N.G.O. og mga charity foundation nga gikan pa sa kauluhang Manila og sa gawas sa nasud.

Nahuman ang maong provincial culmination program pinaagi sa mga nindot nga paindigay sa poster making, interpretative dance og Pinoy Henyo diin mismong ang mga PWD sa matag munisipyo sa Sarangani ang malipayon nga nisalmot aron ipakita ang ilang mga nagkadaiyang abilidad og talento.

* Atong paminawon ang magkasunod nga mga pamahayag nila Supervising Labor and Employment Officer sa Department of Labor Rabia Bajolo, Executive Assistant Cesario Cagas, og Sarangani PWD Federation vice president og acting president Ildefonso Gargaran: 

Audio:

Sarangani Awards

Legislative Information