Governor Solon, mapasalamaton sa nadawat nga mga pasidungog

11 Aug 2015
1011 times

Atol sa flag raising sa kapitolyo sa Sarangani kagahapong adlawa, dako ang pagpasalamat ni Governor Steve Chiongbian Solon ngadto sa tanang mga official, mga personahe, mga partner non-government organization og sa tibuok katawhang Sarangan sa ayuda og pagsuporta sa mga programa og mga kalihukan sa probinsya sa Sarangani rason nga niabot og siyam hangtud na sa napulo ka mga dagkong pasidungog ang nadawat sa Provincial Government sa Sarangani.

Sa duha katuig nga pagpanerbisyo sa gibansagang TRIO (pronounced as treyo) nga gilangkuban nila Governor Steve Chiongbian Solon, Congressman Manny Pacquiao og Vice Governor Jinkee Pacquiao kauban ang mga board member, napulo ka mga regional, nasyonal og internasyonal award ang nadawat sa Sarangani Provincial Government.

Una ng nasakmit sa Sarangani sa ikaduhang higayon niaging tuig og karong tuiga ang Most Prepared Provincial Disaster Risk Reduction and Management Council sa tibuok Rehiyon Dose. Nahimong Best Tourism Event sa tibuok Pilipinas ang gikonsidera nga pinakadako nga beach festival sa nasud, ang Sarangani Bay Festival. Nakaangkon ang Sarangani og award nga Best Cultural Preservation Effort sa tibuok Southeast Asia tungod sa water tubing project sa Maitum. Nahimo usab kini nga most visited tourist destination sa tibuok Region 12 human gideklara sa Department of Tourism. Nakaangkon usab og pasidungog ang probinsya isip Best Implemented School of Living Tradition nationwide pinaagi sa Lamlifaw Village Museum sa Malungon. Nahimong Top 1 ang DepEd Sarangani sa NAT kon National Achievement Test. Gitagaan og award ang Sarangani nga Most Outstanding Philippine Mammal Stranding Response Network Chapter sa tibuok nasud tungod sa pagprotekta og pag-responde sa mga butanding og uban pang mga marine mammal sa Sarangani Bay. Bag-uhay lamang usab kini gipasidunggan sa Bangko Sentral ng Pilipinas isip nag-inusara nga Best LGU Partner sa tibuok Pilipinas sa programang Credit Surety Fund. Og sa hisgutanang good governance, nakadawat ang Sarangani Provincial Government og Seal of Good Financial Housekeeping gikan sa DILG isip pag-ila sa maayo nga pagdumala sa panudlanan sa probinsya.

Sa habig ni Anacleto “Bobby Saya-ang, ang presidente sa unyon sa mga empleyado sa kapitolyo sa Sarangani kon S.P.E.U., pride kon dungog ang pag-ila sa probinsya sa Sarangani pinaagi sa maong mga major awards og padayon matud pa ang pagsuporta sa ilang kahugpungan sa mga kalihukan sa probinsya alang sa padayon nga kalambuan.

* Dia sila Sarangani Governor Steve Chiongbian Solon og SPEU President Anacleto “Bobby” Saya-ang, atong dunggon:

Audio:

Sarangani Awards

Legislative Information