ALABEL, Sarangani (July 19,2022) - Nagpadayag og suporta si Gobernador Rogelio "Ruel" D. Pacquiao sa mga organisasyon nga nagatabang sa kampanya batok sa pagdaghan sa Crown of Thorns (COT) kon dap-ag sa Sarangani Bay.

Kini atol sa pagbisita sa SarBay Freedivers sa buhatan ni Gobernador Pacquiao aron muhangyo og suporta alang sa pag-awhag sa katawhan nga mukuyog kanila sa pagpangolekta og dap-ag.

Positibo nga gitubag sa gobernador ang mga panginahanglanon sa mga nasampit sama sa bangka nga kargahan sa makolektang mga dap-ag, pagkaon alang sa mga mupartisipar sa aktibidad, ug sa pag-awhag sa katawhan alang sa dugang manpower sa pagpangolekta sa dap-ag.

Mupahigayon ang Sarbay Freedivers sa ilang COT Collection karong umaabot nga Hulyo 21-23 sa Sumbang Point, Barangay Taluya sa Glan ug sa Hulyo 28-30 sa Tuka Marine Park sa Kiamba.

Kahibaluan nga ang Crown of Thorns usa ka matang sa starfish nga gikonsidera nga peste sa pipila ka bahin sa Sarangani Bay kung asa ubay-ubay na nga mga government ug non-government organizations ang namugna aron kapugngan ang padayong pagdaghan niini.

Tungod sa Crown of Thorns posibleng mahurot ang mga isda gumikan sa ginakaon niini ang mga coral reefs nga maoy pinuy-anan sa mga isda. (Ivan Polonan - CDU-PGO/PIO)