Monday, 15 August 2022
Thursday, 07 July 2022 20:24

Gov. Ruel Pacquiao, full support sa mga proyekto sa agrikultura sa Sarangani

ALABEL, Sarangani (July 7, 2022) - Nagpadayag ug bug-os nga suporta si Gobernador Rogelio "Ruel" D. Pacquiao sa mga programa ug proyektong pang-agrikultura sa probinsya sa Sarangani.

Gipahayag kini sa gobernador atol sa natigayong courtesy call sa Philippine Association of Agriculturists, Inc. sa pagpanguna ni Virginia R. Cardenas, Ph.D., ang Agricultural Education and Extension Management Consultant karong adlawa, Hulyo 7, sa buhatan sa gobernador.

Atol sa nasampit nga panagpulong, gibutyag ni Dr. Cardenas nga tumong sa pagbisita ang mangayo ug pagtugot kang Gov. Pacquiao aron magpahigayon ug pagtuon sa probinsya kabahin sa proyektong Baseline Farming for the Upland, Coastal and Lowland Small Farmers sa United Nations Decade of Family Farming nga gi-implementar sa Department of Agriculture (DA)-Agricultural Training Institute.

Gibutyag sa opisyal nga ugaling masugdan na ang maong proyekto, dili lamang sila ang makabenipisyo niini kung dili lakip usab ang probinsya kung asa, human sa lima ka tuig masukod, matod pa, ang progreso ug epekto niini sa mga gagmayng mag-uuma sa probinsiya.

Dugang pa ni Dr. Cardenas, pinaagi niini, mamahimong masukod usab ang performance sa pagdumala ni Gobernador Pacquiao mahitungod sa agri-fisheries sa probinsiya. Mamahimo, matod pa, nga gamiton sa gobernador ang mga impormasyon gikan sa maong pagtuon aron mas mapalambo pa ang nasampit nga sektor.

Gumikan sa positibong tubag ni Gobernador Pacquiao, hilabihan kining gikalipay ni Dr. Cardenas ug gilaumang mahimong mabungahon ang mamahimong partnership niini sa Probinsiya. (Ivan Polonan - CDU-PGO/Ronda Probinsya Sarangani)

Read 166 times